LËTZEBUERG
JACQUELINE KIMMER

Den Educatiounsministère lancéiert eng Campagne iwwer d’Lëtzebuerger Orthographie

„Lëtzebuergesch ass den droende Pilier vun eiser sproochlecher Identitéit" sot den Educatiounsminister Claude Meisch gëschter Muere bei der Presentatioun vun der Ëffentlechkeetscampagne iwwert d’Lëtzebuerger Orthographie. Aus dësem Grond ass et och e grousst Uleies vum Educatiounsministère, fir "eis Nationalsprooch ze fleegen an ze fërderen".

En allgemenge Wonsch

Gëtt an der Ëffentlechkeet iwwert de Stellewäert vun der Lëtzebuerger Sprooch diskutéiert, da gëtt meeschtens drop verwisen, dat si haut esouvill wéi nach ni an eiser Gesellschaft geschwat gëtt. Och wann d’Lëtzebuergesch virun allem an der mëndlecher Kommunikatioun benotzt gëtt, esou muss ee feststellen, datt dat Schrëftlecht eng ëmmer méi wichteg Roll an eisem Alldag spillt.

Allgemeng bestinn awer och de Wonsch an de Wellen an der Gesellschaft, fir korrekt Lëtzebuergesch schreiwen ze kënnen. Awer net jiddereen, wéi de Minister Meisch korrekt gesot huet, fënnt d’Zäit, fir reegelméisseg an e Cours ze goen. Dofir huet den Educatiounsministère fir dës Orthographie-Campange elo Materialien ausgeschafft, déi jidwerengem, deen un der Lëtzebuerger Orthographie interesséiert ass, als Hëllefstellung dénge kënnen.

Fir de breede Public

D’Zilpublikum vun der Campagne iwwer d’Lëtzebuerger Orthographie sinn, wéi de Minister ënnersträicht, „Jonker bis Erwuessener“. D’Campagne riicht sech net exclusiv u Schülerinnen a Schüler, mee allgemeng un de breede Public. Déi eenzeg Viraussetzung ass, datt ee Lëtzebuergesch schwätze kann. Vu Virdeel ass, wann een och gewësse Kompetenzen am Däitschen an am Franséischen huet.

Déi nei Campagne geet vu bekannten Zitater aus dem Lëtzebuerger „patrimoine culturel“, also der Literatur, der Musek an dem Film aus. Aacht Zitater goufen ausgewielt an a Form vun Affichen a kuerze Videoe graphesch op uspriechned Aart a Weis opgeschafft, fir unhand dovu jeweils eng orthographesch Reegel ze erkläeren.

Loscht op méi Orthographie-Reegele maachen

Zil ass et, wéi de Minister Meisch sot, „Loscht a Virwëtz op déi méi detailléiert Orthographie-Reegelen ze maachen", déi um Internetsite www.schreiwen.lu (beziehungsweis op Facebook) explizéiert ginn.

De Kulturministère begréisst dës Initiativ, ewéi de Staatssecretaire Guy Arendt ënnerstrach huet. Mat dëser Campagne iwwert d'Lëtzebuerger Orthographie kann, senger Meenung no, jiddereen eppes léieren. Weider sot den Arendt, den LOD (Lëtzebuerger Online Dictionnaire) huet am Moment Schwieregkeete fir säin Online Dictionnaire fäerdeg ze kréien, well nach e puer Reegelen net ganz kloer sinn.