LËTZEBUERG
SAMUEL HAMEN

De Jhemp Hoscheit schreift an „L’imagination“ op Franséisch iwwer d’Muecht vun der Fantasie

Bei de leschte Walfer Bicherdeeg am November 2014 krut de Jhemp Hoscheit fir säi Kannerbuch „Den Eppes“ de Lëtzebuerger Buchpräis an der Kategorie „Kanner- a Jugendbuch“ iwwerreecht. A senger Ried huet hien deemools mat Verve an Idealismus dovu geschwat, wéi wichteg et wier, eise Kanner eng besonnesch Lieskultur ze vermëttelen. An dat heescht: hinne vill an dacks virzeliesen, hinnen am richtegen Alter déi richteg Bicher ze ginn an ëmmer hir virwëtzeg Loscht z’ënnerstëtzen, sech an aner Welten eranzefuussen.

Knapps e Joer méi spéit, leet den Hoscheit mat sengem Buch „L’imagination“ eng praktesch Äntwert op seng deemoleg Ried vir. Wann en nom Opklappen a nach virum Liesen déi éischt Illustratioun gesäit, kritt een en Androck dovun, wat den Hoscheit wëlles huet. E jonkt Meedche sëtzt virun engem Spigel, vu lauter Konzentratioun sinn d’Aen an d’Lëpsen zesummegepëtzt, a virun him läit ee Smartphone onnëtz um Dësch, ongeféier sou, wéi hautdesdags Äschebecher onnëtz an de meeschte Caféë rondrëmstinn. De mediekritesche Message ass kloer: Hei brauche mir keng Technik, keng Youtube-Videoën a keng Candy-Crush-Spillercher um Handy! Hei erwaart Dech amplaz eng Welt voller Imaginatioun, Erzielungen a Fantasie.

An der Geschicht geet et ëm d’Marie-Rose, ee Meedche vun 12 Joer, dat vill a gäre fabuléiert. Hat schreift Geschichte vun traurege Wolléken, schwätzt vill mat senger Bom a léiert d’Madame Salmi kennen, déi ëmmer nees de Kontakt zum Marie-Rose sicht. Wéi ee Geheimnis huet déi Madame? Soll d’Marie-Rose sech Suerge maachen oder si weider doheem besichen? A firwat wëll si, datt d’Marie-Rose aus engem Buch mam Titel „Reviens!“ virliest? Bei all Renconter am Buch geet et ëm d’Muecht vum Verzielen, ëm d’Relevanz vum Erënneren an ëm d’Wichtegkeet, der Fantasie keng Grenzen ze setzen. Op de knapps 100 Säite baut den Hoscheit en passant gesellschaftlech aktuell Sujeten an: d’Biographie vun der Bom, déi vun hirem Papp verbuede krut, eng Carrière als Auteure unzegoen; d’Vergaangenheet vun der Madame Salmi, der hir Duechter wéinst Mësshandlung an e Foyer placéiert gouf; déi éischt Léift vun der Bom, den Thierry, dee mat 17 Joer am Krich gestuerwen ass.

Fir déi cibléiert Lieserschaft, Kanner vun zéng bis ongeféier véier-zéng Joer, sinn dat natierlech spannend, ma keng einfach Sujeten. „L’imagination“ ass also e Buch, dat fir en encadréiert Liese konzipéiert gouf – entweder duerch d’Elteren oder duerch d’Schoul. D’Kanner brauchen nämlech e gudde Krack Kontextwëssen, fir all Exkurser richteg verstoen an anuerdnen ze kënnen. Dat handlecht Format als Hard-Cover, déi flott Illustratioune vum Julian Renault an d’Vokabelshëllef op all Säit, an der d’Wierder op Franséisch ëmschriwwen an op Lëtzebuergesch iwwersat ginn, mécht „L’imagination“ zu engem praktesche Vademecum fir virwëtzeg jonk Lieser.

A wat nach méi wichteg ass: D’Buch, dat bei „Guy Binsfeld“ erauskoum, ass en engagéierte Bäitrag fir d’Léiere vun der franséischer Sprooch. Datt dat ville Kanner am Primaire an am Lycée schwéier fält, wësse souwuel d’Schüler, déi Verben-Tabellen ausfëlle mussen, wéi och d’Elteren, déi dës Verben-Tabelle konzipéiere mussen. Et kléngt scho bal wéi eng bëlleg Reklamm, ma fir dem Jhemp Hoscheit säi Buch sinn tatsächlech zwee floskelhaft Spréch ubruecht. „L’imagination“ ass e „pädagogesch wäertvoll“ Buch, oder fir et nach méi kloer respektiv platt ze soen: (bal) quadratesch, praktesch, gutt.Samuel Hamen

Haut an zwou Wochen, de 26. November, fannt Dir op dëser Plaz e Kommentar
zu de Walfer Bicherdeeg.