LUXEMBURG
SAMUEL HAMEN

De neie Roman vum Gast Groeber schwätzt vun Emigratioun an Emanzipatioun

Dat neit Buch vum Gast Groeber, „Weekend mat Bléck op Fräiheet“, fänkt domat un, datt e Buch net gelies gëtt. D’Haaptfigur, dat jonkt Leksa, dat zu Lëtzebuerg lieft a schafft an aus Russland kënnt, sëtzt enges Moies am Bus a muss d‘Lecture vu sengem Buch ënnerbriechen. Hatt ass a Gedanken iwwer eng Fro getrollt, déi hatt fir de Rescht vum Weekend an de Lieser de Rescht vum Buch beschäftege wäert, nämlech d’Fro: „Hunn ech oder huet meng Aarbecht mäi Liewen am Grëff?“ Am Laf vun de knapps 200 Säite struewelt d’Protagonistin da géint sëllech Zwäng a hirem Liewen: Géint hire Macho-Frënd, de Mick, dee keng Energie an hir Bezéiung stécht, géint d’Elteren, déi hatt fir d’Weiderféiere vun hirer Entreprise mobiliséiere wëllen a géint d’Bornéiertheet vu Leit, déi sech net virstelle kënnen, wéi eng Russin gläichzäiteg Lëtzebuergerin ka sinn.

De Gast Groeber, deen 2014 fir säin Erzielband „All Dag verstoppt en aneren“ mam Lëtzebuerger Buchpräis ausgezeechent gouf, beschäftegt sech am Roman mat gesellschaftspolitesch virulente Sujeten: D’Schwieregkeete vun Immigranten hei am Land souwéi d’sexuell Orientéierung an d’Emanzipatiounsversich vun der Protagonistin. Fir dës Themen adequat ze verhandelen, mobiliséiert den Auteur a sengem drëtte Roman eng ganz Armada u Figuren, mat deenen d’Leksa, och nach Sascha geruff, all dës Problematike beschwätze kann. Dozou gehéiert eng Koppel, där hatt seng ganz Biografie verzielt, e Schoulfrënd, mat deem hatt sech un d’Zäit am Primaire erënnert an eng Cliente an der Epicerie, déi vun der Schaff als Prostituéiert schwätzt. All dës Leit sinn immens potereg opgeluecht, ma d’Gespréicher liese sech dacks, wéi wann den Auteur seng liewensphilosophesch Iwwerleeungen op zwou Figuren opgespléckt hätt. Authentesch kléngen esou Dialoger seelen, an och d’Gedanke vum Leksa sinn duerchsat vun ze vill Theorie. Sou freet hatt sech eng Kéier, op „et déi Erënnerung un deemools [war], déi mécht, datt et där Taxinomi net wëllt adheréieren“ – bei sou Vokabele stéisst d’Versteesdemech vum Lieser fir d‘Figuren da séier op eng Grenz.

De Roman, dee viru kuerzem bei „Op der Lay“ erauskoum, diagnostizéiert a kommentéiert déi sëllech Schiflagen an eiser Géigewaart, an en hält déi staark Biografie vun enger Fra dogéint, déi net a-, mee ausbrécht an hiren eegene Wee geet. Dës Zort vu Literatur, déi minoritär Randtheme literariséiert an abstrakt Begrëffer wéi Fräiheet an eng gelonge Geschicht pakt, dës Zort vu Literatur soll onbedéngt gelies ginn. Dat eegent Liewen ouni restriktiv Kategorien ze denken, déi engem wéi e Stempel op d’Stir gedréckt ginn – dat ass de Message vun dësem Buch. Russin oder Lëtzebuergerin? Leksa, Sascha oder Sachenka? Bi- oder heterosexuell? Kloer Zouuerdnunge ginn et a „Weekend mat Bléck op Fräiheet“ net. Sou wéi et am Buch un der Protagonistin läit, d’Upakes iwwer hiert Liewen z’erlaangen, sou ass et no dësem Buch um Lieser, ugestëpsten Urteeler z’iwwerpréiwen a beschtefalls z’änneren.

P.S.: Am engleschsproochege Raum gëtt et de sougenannten „Bad Sex in Fiction Award“. Sou vill wéi „Weekend mat Bléck op Fräiheet“ op e Literaturpräis hei zu Lëtzebuerg hoffen dierf, sou vill konkurréiert de Roman mat senge Sexszeenen ëm dës Auszeechnung, déi zënter 1993 decernéiert gëtt. E kuerzt Zitat als Amuse-Gueule: „D’Leksa (…) kuckt no, wéi déi Fra (…) elo eng Fläsch Amarone opmécht, eemol kuerz um Stopp richt an dann d’Glieser mat där donkelrouder Flëssegkeet opfëllt. Hatt spiert, datt seng Broschtwarzen haard ginn an e Kribbelen him vun do bis déiw an de Bauch eraleeft.“ samuel hamen

En Donneschden an zwou Wochen, den 20. August, fannt Dir op dëser Plaz ee Kommentar zu den Auteursporträitë vun der RTL-Rei „Artbox“