BELVAL
NATHALIE ENTRINGER

Mat enger App versiche Fuerscher vun der Uni Lëtzebuerg, d’Lëtzebuerger Sprooch an all hire Facetten ze erhiewen

Mat enger App versiche Fuerscher vun der Uni Lëtzebuerg, d’Lëtzebuerger Sprooch an all hire Facetten ze erhiewen. Dëst Instrument erméiglecht, einfach an de Smartphone eran ze schwätzen, wéi de Schniewel engem gewuess ass. D’Nathalie Entringer, „Chercheur en Formation Doctorale“ vun der Fuerschungsunitéit IPSE op der Uni Lëtzebuerg huet ons dozou Explikatioune ginn. 

„D’Iddi war eigentlech schonn zimlech laang do, fir am grousse Stil Sproochdaten ze erhiewen. Fir dat méiglech ze maachen, brauch een awer net nëmmen déi néideg Mëttel, mee virun allem ass et eng enorm Entwécklungsaarbecht, net nëmme vum Techneschen hir. Dir musst jo kucken, wéi eng Biller an d’App kommen a wéi eng Sätz. An och wéi eng Froen Dir an e Questionnaire setzt a no wéi enge Critèren Dir herno auswäert, wat alles vun Tounopnamen erankënnt.

An et muss och esou sinn, dass d’Informatiounen iwwer d’Participanten anonymiséiert sinn. Do gouf et also ganz vill Austausch tëschent de Fuerscher an den Entwéckler. Mir haten d’Chance, dass mer den techneschen Aspekt net ganz vun Null op hunn entwéckele missen, mee mir konnten op eng ähnlech App opbauen, déi an Holland agesat gouf.

Fir matzemaachen, ass et am Fong ganz einfach. Dir luet d’App erof, déi et momentan fir Apple an iOS gëtt, dir gitt just e puer Daten un - mir leeë keng Profiller un - an Dir schwätzt dann e puer Sätz spontan an de Smartphone. Iwwert d’App kënnt Dir all Opnam direkt lauschteren an dobäi d’Villfältegkeet vum haitege Lëtzebuergesche kenne-

léieren. Matmaache ka jiddereen - egal ob jonk oder al, Mammesproochler oder net, ob vu Steebrécken, aus dem Pommerlach oder vum Rouscht. D’Zil ass et, d’Sprooch vun all Generatioun aus all Uertschaft am Land fir de Grand public an d’Fuerschung ze dokumentéieren.

Et ass ons besonnesch wichteg, dass och esou vill wéi méiglech eeler Matbierger deelhuelen, well si gebrauchen oft nach Wierder, déi haut net méi sou bekannt sinn. Leit, déi net esou gutt mam Smartphone eens ginn, kënnen ons och direkt kontaktéieren.

D’Dauer vun dësem Projet ass ‚open-end‘, dat heescht dass elo net op eng Kéier d’App verschwënnt. Si gëtt weiderentwéckelt. Si brauch och eng gewëssen Dauer, well wat mer méi Opnamen hunn, wat d’Kartographie vum Lëtzebuergeschen méi genee ka ginn.

Mir hunn elo schonn ongeféier 65.000 Opnamen, et goufe schonn eng 370 Froebéi ausgefëllt an d’App gouf schonn 2.200 Mol erofgelueden.

Mir hunn awer och eng Facebook-Grupp geschaf - déi heescht ‚Schnëssen-App - Är Sprooch fir d’Fuerschung‘ -, wou ee sech iwwer d’Entwécklung vum Projet um Lafenden hale kann. Kommt maacht mat! Mat Ärer Participatioun hëlleft Dir eis immens bei der Erfuerschung vun der Sprooch an hiren Dialekter. En décke Merci am Viraus.“